مرايا – محمد فخري – رصاص الإحتلال ضرب أبوي بأريحا وصابه كسور وجروح وركبوله جهاز عشان يقدر يمشي وما قدر يكمل شغله بالإستخبارات العسكرية ، بعد قصته هاي بشهرين إنولدت أنا وسماني إيمان وكنت البنت البكر إنولدت بعد سنة ونص من زواجه ، وفرح أبوي وأمي ومل عيلتي بالبنت اللي كانت شبه الملائكة ،بس صار عمري 4 شهور بتاريخ 7/5/2001 أمي أخذتني زيارة لبيت جدي لإنه كان عندهم قصف وراحت تتطمن على جدي وجدتي وأبوي ضل بالبيت لإنه ما بقدر يمشي ، بس شافوني جدي وجدتي تجمعوا علي زي أي بنت لأي عيلة ، حولي كل العيلة من كبار وصغار ، المل بلعب بخدودي وبشعراتي ، جدي راح على السوق اشترالي أواعي وكان فرحان كثير بزيارة حفيدته إله ، فجأة سمعت صوت إنفجار وشفت أمي وكل اللي حولي خايفين ومرتبكين ، كوني بنت عمرها 4 شهور صعب تفهم إنه في قصف صهيوني وصعب أفهم إنه في صراع ، أمي طلعت على الباب تشوف شو في ، وكان الصوت كل ما فيه بصير أقوى وأعلى وبقرب منا ، صرت أعيط وحسيت اني بخطر ، حملتني أمي وحضنتني وضمتني على صدرها وطلعت تشرد من القصف بلاش يلحقنا ، فجأة وقعوا 3 قذائف قدامها ، هي طارت بجهة وأنا بجهة ، حسيت بوجع بصدري وحسيت انه في شباك هواء بصدري ، ما لحقت أتطلع على صدري الا روحي كانت طالعة ، شظية من القذائف دخلت بصدري وطلعت من ظهري وهيك بلمح البصر ، جدي كان مشتريلي اواعي ومن هول المنظر غيب ، أمي انصابت بشظية من الجنب ودخلت غيبوبة وكل واحد كان حولي غيب من بشاعة المنظر ، جدتي سامية وأولادها دينا ومحمود صابهم جروح خطيرة ودخلوا المستشفى ، مشهد ما صورته الكاميرات ولا الإعلام ، أمي بالمستشفى كل ما تصحى من الغيبوبة تحكي “إيمان إيمان” بصوت واطي وترجع للغيبوبة ، أولاد الحي وقرايبي وجيراني باسوني من راسي ، أبوي أجى على عكازات وبراسه ألف سؤال !
شو عملت إيمان لحتى يضربوها بقذيفة ؟
صنعت صواريخ والا صنعت متفجرات ؟
بجنازتي كل فلسطين طلعت وكل فلسطين هتفت لإيمان حجو ، كل فلسطين حزنت وسألت ليش هالبنت أم 4 شهور تنعدم هيك ، وكان الجواب لإنه الإرهاب ،،
انحملت بنعش على الأكتاف كان هالنعش أكبر من أحلامي وكانت المساحة الفاضية منه حولي مليانة ورد ، وإندفنت بقبر كان أكبر من عمري ونيمت جنبي بالقبر فرحة أمي إللي تحرم عليها الفرح بعد موتي ..
ايمان حجو طفلت من الآف الأطفال اللي راحوا بنفس الطريقة بدون ما حد يدري عنهم ، الآف الأطفال اللي انعدت أرقام بنفس اليوم وإنتست بعدها بيوم .
#الشهيد_ليس_رقمًا،