اليوم بدي احكي عن تجربتي مع الدفاع المدني ،، مبارح كانت عندنا اختي و زوجها و بنتها عم بنتغدا مع بعض اول اشي اختي داخت و بنت اختي كانت غفيانه بلشت تفرفط و انا و جوز اختي و ماما مش مستوعبين شو عم بصير معانا ، فجأه كلنا بطلنا قادرين نتنفس و الحمدلله و لطفه و ستره اني قويت حالي و حكيت مع الجيران اجو جابولنا الدفاع المدني و فتحوا الشبابيك ، حاله اختناق و نقص اكسجين خلانا كلنا مخدرين مش عارفين شو عم بصير ...
اول اشي الدفاع المدني اجو خلال 3 دقايق ، كان معاهم دكتور مسعف و مجهزين بكل اشي حتى اجهزه المراقبه برضه كان معاهم و انابيب الاكسجين ضلوا معانا فوق النص ساعه يسعفوا فينا و لما اتطمنوا انه كل شي تمام اخدونا عالمستشفى ،،، سياره الاسعاف كانت مش ناقصه اشي و تعاملهم كان ولا ارقى من هيك...
يمكن في كتير ناس يحكيلي انه هاد واجبهم ، اكيد هاد واجبهم بس ما ننسى التطوير الرائع اللي صار على سيارات الاسعاف خلوها عياده مصغره متنقله...
نصيحتي اليوم اللي بدي احكيها انه الصحه رزقه و الناس اللي حوالينا رزقه كمان لانه الجيران الحمدلله ضلوا معانا و اجوا بالوقت المناسب...
حافطوا على تهويه البيت منيح لانه مبارح ما حسينا باشي ولا كنا مستوعبين انه احنا عم بننخنق عالبطيء...
تعديل : سبب الاختناق كان صوبه الكاز و ما كنا فاتحين تهويه ، ماما كانت بردانه كتير اضطريت اسكر الشبابيك ،،
رسائل من أحد المواطنين الى الدفاع المدني
